පවතින වියළි කාළගුණ තත්ත්වයක් සමග කැළෑ ගිනි ඇතිවීම් වැළැක්වීම හා පාලනය කිරීමේ අරමුණින් ජනතාව දැනුවත් කිරීමේ ගිනි පාලන සතියක් ඊයේ (24) සිට ක්‍රියාත්මක කිරීමට පියවර ගෙන තිබේ.
ඒ අනුව මාර්තු දෙවන දින දක්වා එම සතිය ක්‍රියාත්මක කිරීමට සැලසුම් කර ඇති බව වනජීවි සංරක්ෂණ දෙපාර්තමේන්තුව සඳහන් කළේය.
පවතින දැඩි වියළි කාලගුණික තත්ත්වයක් සමග මේ දිනවල දිවයිනේ ඇතැම් ප්‍රදේශවල කැළෑ ගිනි ඇතිවීමේ ප්‍රවණතාවක් මතුව තිබේ.
මේ හේතුවෙන් වනාන්තර ආරක්ෂා කිරීමේ ප්‍රමුඛ කාර්යය භාරය, වන සංරක්ෂණ දෙපාර්තමේන්තුව සතු වූව ද කැළෑ ගිනි ඇතිවීම වැලැක්වීම හා පාලනය කිරීම දෙපාර්තමේන්තුව සතු සීමිත මානව සම්පත මගින් සිදුකළ නොහැකි බව එම දෙපාර්තමේන්තුව සඳහන් කළේය.
එබැවින් කැළෑ ගිනි ඇතිවීමේ ප්‍රවනතාව ඉහළ යාමත් සමග ඒ සම්බන්ධව ජනතාව දැනුවත් කිරීම සඳහා ගිනි පාලන සතියක් මෙලෙස ක්‍රියාත්මක කිරීමට වනජීවි සංරක්ෂණ දෙපාර්තමේන්තුව පියවර ගෙන තිබේ.
මේ අතර කැළෑ ගිනි ඇතිවීම වැළැක්වීමට හා පාලනය කිරීමට අවශ්‍ය සහාය රාජ්‍ය ආයතන මගින්ද ලබා ගන්නා ලෙස වනජීවි හා වන සම්පත් අමාත්‍යවරයා විසින් උපදෙස් ලබාදී ඇති බවද වනජීවි සංරක්ෂණ දෙපාර්තමේන්තුව වැඩිදුරටත් සඳහන් කරයි.
