කුඩා දැරියන්ගේ ඡායාරූප යොදා ගනිමින් ඔවුන් සම්බන්ධව ලිංගික හැඟීම් උද්දීපනය වන ආකාරයේ පෝස්ට් පල කරනු ලබන ෆේස් බුක් පිටුවක් සම්බන්ධව අරුණ ඊයේ (03 වැනිදා) කළ දැනුම්දීමෙන් පසු ආරක්ෂක අමාත්‍යාංශය සහ අපරාධ පරික්ෂණ දෙපාර්තමේන්තුව වහාම පරික්ෂණ ආරම්භ කර ඇත.
මෙම ෆේස්බුක් පිටුවෙහි පෙර පාසල් සහ පාසල් යන වයස්වල කුඩා ගැහැනු ළමුන්ගේ ජායාරූප පලකරමින් ඔවුන් සම්බන්ධව නොයෙකුත් පුද්ගලයන්ගෙන් අදහස් ලබා ගැනීමට අදාළ ෆේස්බුක් පිටුව පවත්වාගෙන යන පිරිස කටයුතු කරමින් සිටියි.
මෙම කුඩා ගැහැනු දරුවන්ගේ ජායාරූප වෙනත් දෙමාපියන්ගේ මුහුණුපොත්වලින් ලබාගෙන ඇත.
එම පිටුවෙහි සාමාජිකත්වය ලබා ඇති පුද්ගලයන්ගේ අදහස් විමසා අදාළ පිටුව නිරතුරුව යාවත්කාලීන කරමින් පවත්වාගෙන යනු ලබයි.
මේ වන විට අදාළ ෆේස්බුක් පිටුව පුද්ගලයන් හාරදහස් හයසියයක පමණ පිරිසක් සාමාජිකත්වය (ෆලෝවර්ස්) ලබාගෙන තිබේ.
එසේම අදාළ ෆේස්බුක් පිටුව මීට මාස දෙකකට පමණ ඉහතදී නිර්මාණය කර ඇති බව තහවුරු වෙයි. මේ සම්බන්ධව ජාතික ළමාරක්ෂණ අධිකාරිය ද තොරතුරු ලබාගනිමින් සිටින බවත් එම තොරතුරුවලට අනුව ඉදිරියේදී අදාළ පියවර ගනු ලබන බව ළමාරක්ෂණ අධිකාරියේ සභාපති ජ්‍යෙෂ්ඨ කථිකාචාර්ය උදය කුමාර පැවසීය
