එක්සත් රාජධානියේ කොවිඩ් රතු ලැයිස්තුවෙන් ශ්‍රී ලංකාව ඉවත් කිරීමට එරට තීරණය කර තිබේ. 2021 සැප්තැම්බර් 22 වැනිදා (බදාදා) අලුයම 4.00 සිට එය ක්‍රියාත්මක බව ලන්ඩනයේ පිහිටි ශ්‍රී ලංකා මහ කොමසාරිස් කාර්යාලය සඳහන් කරයි.
එක්සත් රාජධානියේ ප්‍රවාහන ලේකම් ග්‍රාන්ට් ශප්ස් සඳහන් කර ඇත්තේ ශ්‍රී ලංකාව ඇතුළු රටවල් 8ක් රතු ලැයිස්තුවෙන් ඉවත්කරන බවයි. තුර්කිය, මාලදිවයින, ඊජිප්තුව, පාකිස්තානය, ඕමානය, බංග්ලාදේශය සහ කෙන්යාව එම රටවල්ය. රතු ලැයිස්තුවෙන් ඉවත්කරන ලද මෙම රටවල් අඩු අවදානමක් දැක්වෙන ‘ඇම්බර් ලැයිස්තුවට’ (Amber list) ඇතුළත් කර ඇත. එක්සත් රාජධානිය ශ්‍රී ලංකාව රතු ලැයිස්තුවට ඇතුළත් කරන ලද්දේ පසුගිය වකවානුවේ කොවිඩ් වසංගතය ශ්‍රී ලංකාවේ සීග්‍ර ලෙස ව්‍යාප්තවීම හේතුවෙනි.
ඒ අනුව අදාළ රටවල්වලින් පැමිණෙන සංචාරකයින් හෝ පුද්ගලයින් සඳහා හෝටල් නිරෝධායනය අවශ්‍ය නොවනු ඇත. සැප්තැම්බර් 22 වැනි දින සිට ශ්‍රී ලංකාවේ සිට එංගලන්තයට ඇතුළු වන ඕනෑම අයෙකු එංගලන්තයට යාමට දින 3 කට පෙර කොවිඩ් පීසීආර් පරීක්ෂණයක් කළ යුතු අතර, බ්‍රිතාන්‍යයට පැමිණීමෙන් පසු සිදුකළ යුතු පීසීආර් පරීක්ෂණයක් සඳහා මුදල් වෙන් කරවාගෙන සිටිය යුතුය. සම්පූර්ණ එන්නත්කරණයට ලක්වී ඇත්නම් එරටට පැමිණීමෙන් අනතුරුව පීසීආර් පරික්ෂාවකට ලක්වීම ද අවශ්‍ය නොවන බව බ්‍රිතාන්‍ය ප්‍රවාහන ලේකම්වරයා සඳහන් කර ඇත.
