පොලිස් මාධ්‍ය ප්‍රකාශක, ජ්‍යෙෂ්ඨ පොලිස් අධිකාරි නීතිවේදී බුද්ධික මනතුංග සිය ධුරයෙන් ඉල්ලා අස්වූ බවට මාධ්‍ය මගින් ඊයේ (මාර්තු මස 20) වාර්තා කර තිබිණි.
පොලිස් මාධ්‍ය ප්‍රකාශක තනතුරේ කටයුතු කළ නියෝජ්‍ය පොලිස්පති නිහාල් තල්දුව එම ධුරයෙන් ඉවත් වීමෙන් පසු නව පොලිස් මාධ්‍ය ප්‍රකාශකවරයා ලෙස ජ්‍යෙෂ්ඨ පොලිස් අධිකාරි බුද්ධික මනතුංග සිය ධුරයේ රාජකාරී ආරම්භ කරන ලද්දේ පසුගිය දෙසැම්බර් මස 16 වැනිදා යි.
ධුරයේ වැඩ භාර ගැනීමෙන් අනතුරුව මාස 03ක් වැනි කෙටි කාලයක් තුළදී ඉන් ඉල්ලා අස්වීමට ජ්‍යෙෂ්ඨ පොලිස් අධිකාරි බුද්ධික මනතුංග කටයුතු කරනු ලැබුවේද? මේ බීබීසී සිංහල සේවය ඒ පිළිබඳව සිදුකළ කරුණු සොයා බැලීමයි.
ධුරයෙන් ඉල්ලා අස්වූ ලිපිය
බීබීසී සිංහල සේවය වෙත වාර්තා වන පරිදි ජ්‍යෙෂ්ඨ පොලිස් අධිකාරි බුද්ධික මනතුංග විසින් පොලිස් මාධ්‍ය ප්‍රකාශක ධුරයෙන් ඉල්ලා අස්වීමේ ලිපිය වැඩබලන පොලිස්පති ප්‍රියන්ත වීරසුරිය වෙත මීට දින කිහිපයකට පෙර යොමු කර තිබේ.
පෞද්ගලික අවශ්‍යතාවයක් හේතුවෙන් තමන්ට පොලිස් මාධ්‍ය ප්‍රකාශක තනතුරෙන් ඉල්ලා අස්වීමට අවශ්‍ය බවට ජ්‍යෙෂ්ඨ පොලිස් අධිකාරි බුද්ධික මනතුංග සිය ලිපිය මගින් දන්වා තිබු බව වාර්තා වේ.
වැඩබලන පොලිස්පතිවරයාගේ ප්‍රතිචාරය
පොලිස් මාධ්‍ය ප්‍රකාශක තනතුරෙන් ජ්‍යෙෂ්ඨ පොලිස් අධිකාරි බුද්ධික මනතුංග ඉල්ලා අස්වූ බවට මාධ්‍ය විසින් ඊයේ (මාර්තු 20) කරුණු වාර්තා කිරීමෙන් පසුව බීබීසී සිංහල සේවය ඒ සම්බන්ධයෙන් වැඩබලන පොලිස්පති ප්‍රියන්ත වීරසුරියගෙන් කරුණු විමසීමක් සිදු කරන ලදී.
එහිදී වැඩබලන පොලිස්පතිවරයා කියා සිටියේ ජ්‍යෙෂ්ඨ පොලිස් අධිකාරි බුද්ධික මනතුංග විසින් පොලිස් මාධ්‍ය ප්‍රකාශක තනතුරෙන් ඉල්ලා අස්වීමට අවසර ඉල්ලා යොමු කළ ලිපිය තමන් විසින් පිළිනොගත් බව යි.
”නැහැ..නැහැ.. ඒක පිළිඅරගෙන නැහැ. එයාට වැඩකරන්න කියලා කියනවා දිගටම.” වැඩබලන පොලිස්පතිවරයා එහිදී පැවසුවේය.
‘ වගකීමෙන් ඉවත් වෙන්න බැහැ’
මේ අතර පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි බුද්ධික මනතුංග අද (මාර්තු 21) පැවති පොලිස් විරු දින සැමරුමෙන් අනතුරුව මාධ්‍ය වෙත අදහස් දක්වමින් පැවසුවේ පොලිස් නිලධාරියෙක් ලෙස තමන්ට පවරා ඇති වගකීමෙන් ඉවත් විය නොහැකි බැවින් සුදුසු නිලධාරියෙකු පත්කරන තෙක් අඛණ්ඩව තමන් පොලිස් මාධ්‍ය ප්‍රකාශක තනතුරේ කටයුතු කරන බව යි.
”ඔව් ඇත්තට ම පොලිස් නිලධාරියෙක්ට යම් වගකීමක් පැවරුවට පස්සේ ඒ වගකීමෙන් ඉල්ලා අස්වීමේ හැකියාවක් නැහැ. නමුත් මම මගේ පුද්ගලික හේතු මත ස්ථාන මාරුවක් ඉල්ලා තියෙනවා. නමුත් ඒ සම්බන්ධයෙන් කටයුතු කරලා ඉදිරියේදී නිලධාරියෙක් පත්කරන තුරු පවරලා තියෙන වගකීමෙන් මිදීමට මට හැකියාවක් නැහැ. ඒ අනුව ඉදිරියේදී ඊට අදාළ ඉදිරි කටයුතු සිදුවෙලා ඒ සම්බන්ධයෙන් ඉහළ නිලධාරීන් යම් තීරණයක් ලබාදෙන තුරු මම මේ තනතුරේ රාජකාරී කටයුතු කරනවා. ඒකයි පොලිස් නිලධාරියෙකුගේ රාජකාරී ස්වභාවය වෙන්නේ.”
”මම ඉදිරිපත් කරපු ඉල්ලීම අනුව ජාතික පොලිස් කොමිෂන් සභාව විසින් පත්කිරීමක් කරන තුරු මම මගේ රාජකාරී කටයුතු පොලිස් මාධ්‍ය ප්‍රකාශකවරයා විදිහට ඉදිරියටත් සිදුකරනවා.” ඔහු පැවසුවේය.
