මුහුණු පොතේ ව්‍යාජ ගිණුමක් සකස් කර පොලිස් නිලධාරීන් ලෙස පෙනී සිටිමින් මුදල් වංචා කිරීමක් සම්බන්ධව රක්ෂිත බන්ධනාගාරගතව සිටි පුද්ගලයෙකු තවදුරටත් රක්ෂිත බන්ධනාගාරගත කිරීමටත් ,
අපරාධ පරීක්ෂණ දෙපාර්තමේන්තුව විසින් සිදු කරන ලද වැඩිදුර විමර්ශන අනුව අත්අඩංගුවට ගත් තවත් පුද්ගලයෙකු (12 වැනිදා) හඳුනාගැනීමේ පෙරට්ටුවකට ඉදිරිපත් කරන තෙක් රක්ෂිත බන්ධනාගාරගත කිරීමටත් මොරටුව අතිරේක මහේස්ත්‍රාත් උද්දාල සුවහන්දුරුගොඩ අද (08 වැනිදා) නියම කලා.
මෙම පුද්ගලයන් පොලීසියේ බව හඟවමින් උප පොලිස් පරීක්ෂක සහ කොස්තාපල් සම්මුඛ පරීක්ෂණ සඳහා පෙනී සිටි පුද්ගලයන්ගෙන් එම කටයුතු කඩිනමින් කර දෙන බවට පවසා මුදල් ගිණුමකට තැන්පත් කර ඇතැයිද , පොලීස් නිලධාරීන් ලෙස විවිධ පුද්ගලයන්ට විවිධ ආකාරයෙන් තර්ජනයන් සිදු කර ඇති බවත් , පුත්තලම ප්‍රදේශයේ පුද්ගලයෙකුගේ දියණියකගේ ප්‍රේම සබඳතාවයක් නැවැත්වීමට මුදල් ලබා ගෙන ඇතැයි ද සිදු කරන ලද විමර්ශනවලදී හෙළි වූ බව අපරාධ පරීක්ෂණ දෙපාර්තමේන්තුවේ නිලධාරීන් මහේස්ත්‍රාත්වරයා හමුවේ කියා සිටියා.
ඒ අනුව ඉදිරිපත් වූ කරුණු සලකා බලා සැකකරුවන් දෙදෙනාම (12 වැනිදා) දක්වා රක්ෂිත බන්ධනාගාරගත කිරීමට අතිරේක මහේස්ත්‍රාත්වරයා නියම කලා.
මහේස්ත්‍රාත් නිල මැදිරියේදී මෙම නඩුව විභාග වන අවස්ථාවේදී අත්අඩංගුවට ගෙන තිබූ දෙවන සැකකරු සිහි මුර්ජාවක් වී වෙවුලමින් ඇද වැටීමක් සිදු වූ අතර ඔහුට අවශ්‍ය ඖෂධ ලබා දීමට ඔහු වෙනුවෙන් පෙනී සිටි නීතිඥවරයා ඔහුගේ ඥාතීන් ගෙන් ඉල්ලා සිටියා.
