අත්තනගල්ල නගරයේ අත්තනගලු ඔය අසල කුඩා පැලක සිටි කාත්කවුරුත් නැති කන්තාවක ඔයේ සැඩ පහරට අසු වී ගසා ගෙන යද්දී පැය හතරක මෙහෙයුමකින් පසු දිවි බේරා ගත් පුවතක් නිට්ටඹුව පොලිසියෙන් වාර්තා වෙයි
වයස අවුරුදු හැටක් පමණ කේ. කරුණාවතී නැමැති මෙම කාන්තාව පෙරදින රාත්‍රී නිදා ගෙන සිටියදී දැඩි වර්ෂාවත් සමග ගලා ආ මහා ජල පහරකට අසු වී අතුපැලත් සමග ගසා ගෙන යද්දී ඔයට නැමී තිබූ අත්තක එල්ලී ඇය කෑ ගසා ඇත.
එම සද්දය ඇසි අසල්වාසීන් පිරිසක් එම ස්ථනයට පැමිණියත් ඇය බේරා ගැනීමට නොහැකිවූ නිසා වහා ක්‍රියාත්මක වී 119 පොලිස් හදිසි ඇමතුම් අංකයට මේ බව දන්වා ඇත.
ඒ අනුව නිට්ටඹුව පොලීසියේ පොලිස් සැරයන්වරුන් වන හේමචන්ද්‍ර (47617) හා අමිත්(61798) යන මහත්වරු සුළු වේලාවක් ඇතුළත එම ස්ථානයට පැමිණ බලද්දී කාන්තාව ගසේ අත්තක එල්ලී සිටිනවා දුටුවත් සැඩ පහරට පැන ඇය බේරා ගැනීමට නොහැකි වීමත් සමග පොලිස් නිලධාරීන් දෙදෙනා පිහිනීමට දක්ෂ රුග්ගහවිල උඩුගොඩ පදිංචි ඩබ්ලිව් ඒ අසංක නිරෝෂන්(38) මහතාට දුරකථන ඇමතුමක් දී ඇත.
ඒ මහතා විනාඩි දහයකටත් වඩා අඩු කාලයකදී එම ස්ථානයට පැමිණ මහා සැඩ පහරට පැන පැය හතරකටත් වඩා වැඩි කාලයක් දැඩි පරිශ්‍රමයක් දරා පෙරදින අලුයම 04 ට පමණ එම කාන්තාව ඔයෙන් ගොඩ ගෙන වහාම වතුපිටිවල රෝහලට රැගෙන යාම නිසාම ඇයගේ දිවි බේරා ගැනීමට හැකි වී ඇත.
(http://www.lankadeepa.lk/ වෙබ් අඩවිය ඇසුරිනි)
