කළුබෝවිල ප්‍රදේශයේ මෝටර් රථ අමතර කොටස් අලෙවිසැලක් ඉලක්ක කර යතුරු පැදියකින් පැමිණි දෙදෙනෙකු විසින් ඊයේ (16) දහවල් සිදුකළ වෙඩිතැබීම සම්බන්ධයෙන් තොරතුරු රැසක් අනාවරණය කරගැනීමට පොලීසිය සමත්ව ඇත.
පොලීසිය පවසන්නේ මෙම වෙඩි තැබීම බඩෝවිට අසංක නැමැත්තාගේ පාර්ශ්වය විසින් සිදුකරන ලද්දක් බවට සැකකරන බවයි.
මෙම වෙඩි ප්‍රහාරයට ලක් වූ අලෙවිසැල සංවිධානාත්මක අපරාධකරුවෙකු වන ඩුබායි අවිශ්ක නැමැත්තාගේ බාප්පාට අයත්වූවක් බව පොලීසිය පවසයි.
ඩුබායි අවිශ්ක යනු තවත් සංවිධානාත්මක අපරාධකරුවෙකු වන කොස් මල්ලී නැමැත්තාගේ සමීපතමයෙකු බව සඳහන් වේ.
කෙසේ නමුත් කොස් මල්ලි හා බඩෝවිට අසංක කලක සිට විරසකයකින් සිටින බව පොලීසිය පවසයි.
එම විරසකයේ ප්‍රතිඵලයක් ලෙස දෙපාර්ශ්වයේම පුද්ගලයින් 6 දෙනෙකු මේ වනවිට ඝාතනයට ලක්ව ඇත.
ඒ අනුව එහි තවත් දිගුවක් ලෙසින් කොස් මල්ලීට රිදවීමේ අරමුණින් මෙලෙස බඩෝවිට අසංක නැමැත්තා කොස් මල්ලීගේ සමීපතමයෙකු වන ඩුබායි අවිශ්කගේ බාප්පා ඉලක්ක කර මෙම වෙඩි ප්‍රහාරය එල්ල කර තිබේ.
මේ අතර ගල්කිස්ස අපරාධ විමර්ශන කාර්යංශය පසුගියදා හොරොයින් කිලෝ එක හමාරක් හා කෙරළ ගංජා කිලෝ 4ක් සමගින් කාන්තාවක් ඇතුළුව පුද්ගලයින් තිදෙනෙකු අත්අඩංගුවට ගැනීමට සමත් විය.
ඉන් අත්අඩංගුවට පත් කාන්තාව ඩුබායි අවිශ්කගේ අම්මා බව සඳහන්.
මෙම සිද්ධියේ විමර්ශ කටයුතු කොළඹ දකුණ භාර නියෝජ්‍ය පොලිස්පති ගයංග මාරපන මහතාගේ උපදෙස් මත සිදුකරනු ලබයි.
