ජනාධිපති අනුර කුමාර දිසානායක 2024 සැප්තැම්බර් 23 වන දා ජනාධිපති ධූරයේ වැඩ භාරගත් දින සිට මේ වන විට දින 100ක් ගෙවී ගොස් තිබේ.
ජනාධිපතිවරණයට පෙර ජනාධිපතිවරයා බීබීසී සිංහල සමග කළ සම්මුඛ සාකච්ඡාවේදී ඔහුගේ පළමු දින 100 තුළ කිරීමට බලාපොරොත්තු වන කරුණු 5ක් ඉදිරිපත් කළේ ය.
ඊට අමතරව ඔහු ඇතුළු ජාතික ජන බලවේග ආණ්ඩුව විසින් මේ වන විට ඉටු කරනු ලැබ ඇති කාර්යයන් ප්‍රමාණයක් තිබෙන අතර, ඔවුන්ගේ ජනාධිපතිවරණ ප්‍රතිපත්ති ප්‍රකාශය තුළ තවත් පොරොන්දු රැසක් අන්තර්ගත විය.
ජනාධිපතිවරයාගේ පළමු දින 100 කාලය තුළ ඔහු සිදු කර ඇත්තේ මොනවා ද? මේ ඒ සම්බන්ධයෙන් බීබීසී සිංහල කළ සොයාබැලීමකි.
ජනාධිපතිවරණයට පෙර ජනාධිපති අනුර කුමාර දිසානායක බීබීසී සිංහල සමග සම්මුඛ සාකච්ඡාවකට එක් වූ අතර, එහි දී බීබීසී සිංහල විමසූ පැනයකට පිළිතුරු දෙමින් ජනාධිපතිවරයා පළමු දින 100 තුළ ඉහත කාර්යයන් කරන බව පැවසුවේ ය.
ජනාධිපතිවරයා බලයට පත් වීමෙන් පසු නොවැම්බර් 14 වන දා මහමැතිවරණය පවත්වා තුනෙන් දෙකක පාර්ලිමේන්තු බලයක් හිමි කර ගැනීමට ජාතික ජනබලවේගය සමත් විය.
නව අගවිනිසුරු ලෙස ශ්‍රේෂ්ඨාධිකරණ විනිසුරු මුර්දු නිරූපා බිඳුෂිණි ප්‍රනාන්දු දිවුරුම් දීම අධිකරණ පද්ධතියේ මෙතෙක් සිදු වූ වෙනස්කමකි.
එමෙන් ම බදු වංචාවක් සම්බන්ධයෙන් මේ වන විට අධිකරණයේ විභාගවන නඩුවකට අදාළව මෙන්ඩිස් සමාගම මෙතෙක් හිඟ බදු නොගෙවා ඇති බැවින් එහි බලපත්‍රය අත්හිටුවීම ද සිදු විය.
තව ද අඩු අදායම්ලාභී ජනතාව වෙනුවෙන් අස්වැසුම සහනාධාරය ලබා දීම අඛණ්ඩව සිදු කෙරෙන අතර, අස්වැසුම හිමි පවුල්වල පාසල් යන දරුවන්ට පාසල් උපකරණ මිලට ගැනීමට රු. 6000ක දීමනාවක් ලබා දීමට ද කැබිනට් අනුමැතිය හිමි විය.
ජනාධිපතිවරණයට ඉදිරිපත් වූ අපේක්ෂකයින් අතුරින් දීර්ඝතම ප්‍රතිපත්ති ප්‍රකාශය ඉදිරිපත් කළේ වත්මන් ජනාධිපති අනුර කුමාර දිසානායක ය.
ඔහුගේ එම ප්‍රතිපත්ති ප්‍රකාශය නම් කර තිබුණේ “පොහොසත් රටක්, ලස්සන ජීවිතයක්” ලෙසයි.
එහි අංශ කිහිපයක් යටතේ එක් එක් අංශයේ සිදු කිරීමට බලාපොරොත්තුවන වෙනස්කම් සඳහන් කර තිබිණි.
ඒ අතර කඩිනමින් ඉටු කරණ බවට වූ පොරොන්දු කිහිපයක් සඳහන් විය.
හිඟ බදු අය කරගැනීම පිළිබඳව මේ වන විට ආණ්ඩුවේ අවධානය යොමුව ඇති අතර, මෙන්ඩිස් සමාගමේ බලපත්‍රය අත්හිටවූයේ ද එහි දිගුවක් ලෙසයි.
තවද පාස්කු ප්‍රහාරය සම්බන්ධ පරීක්ෂණ සහ කලක් තිස්සේ නොවිසඳුණු මාධ්‍යවේදීන්ගේ, ක්‍රීඩකයන්ගේ දේශපාලන ඝාතන සහ පැහැරගැනීම් පිළිබඳ විමර්ශන කඩිනමින් පවත්වන ලෙස නැවත සේවයේ පිහිට වූ ජ්‍යෙෂ්ඨ පොලිස් අධිකාරී ශානි අබේසේකර වෙත පවරා තිබේ.
ඒ අනුව, චැනල් 4 නාලිකාව විකාශය කළ වීඩියෝව සම්බන්ධ විමර්ශනයකට අදාළව සාක්ෂි විමසීම සඳහා හිටපු පාර්ලිමේන්තු මන්ත්‍රී සිවනේසතුරෙයි චන්ද්‍රකාන්තන්ව අපරාධ පරීක්ෂණ දෙපාර්තමේන්තුව වෙත කැඳවීම ද සිදු විය.https://flo.uri.sh/visualisation/20993136/embed?auto=1
රජයෙන් ගත් කැබිනට් තීරණ කිහිපයක්
01/10/2024
පාර්ලිමේන්තු මන්ත්‍රීවරුන්ගේ, ඇමතිවරුන්ගේ, හිටපු ජනාධිපතිවරුන්ගේ වරප්‍රසාද පිළිබඳ නැවත සලකා බැලීම
11/10/2024
විශ්‍රාමිකයින්ට රු. 3000ක අන්තර්කාලීන දීමනාවක් ලබා දීම සහ ගොවියන්ට හෙක්ටයාර 2ක් දක්වා හෙක්ටයාරයකට රු. 25,000ක පොහොර සහනාධාරයක් ලබා දීම
25/11/2024
දේශීය වෙළෙඳපොළේ නාඩු සහල් හිඟය සහ සහල් මිල පාලනයට සහල් ආනයනය කිරීම
25/11/2024
ස්වෛරී බැඳුම්කර ප්‍රතිව්‍යුහගත කිරීම ආරම්භ කිරීම
02/12/2024
අතුරු සම්මත ගිණුම පාර්ලිමේන්තුවට ඉදිරිපත් කිරීම
02/12/2024
රාජ්‍ය ආයතනවල අධිසුඛෝපබෝගී වාහන විධිමත් ක්‍රමයකට අපහරණය කිරීම
02/12/2024
අස්වැසුම හිමි පවුල්වල පාසල් දරුවන්ට පාසල් ලිපිද්‍රව්‍ය මිලට ගැනීමට දීමනාවක් ලබා දීම
18/12/2024
දේශීය කිරි නිෂ්පාදනය ඉහළ නැංවීමට ගවයන් ආනයනය කිරීම
18/12/2024
ලුණු හිඟය හේතුවෙන් ලුණු ආනයනය කිරීම
පළමු දින 100 තුළ සිදු වූ විශේෂ සිදුවීම් කිහිපයක්
23/09/2024
හිටපු ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්න මහජන ආරක්ෂක අමාත්‍යංශයේ ලේකම් ධූරයට පත් කිරීම
24/09/2024
දශක දෙකකට පසුව කාන්තාවක් අගමැති ධූරයට පත්වීම
10/10/2024
(විශ්‍රාමික) ජ්‍යෙෂ්ඨ පොලිස් අධිකාරී ශානි අබේසේකර කොන්ත්‍රාත් පදනමින් යළි සේවයේ පිහිටුවීම
15/11/2024
මහ මැතිවරණයෙන් ජාතික ජන බලවේගය ආසන 159ක ඓතිහාසික ජයග්‍රහණයක් ලබා ගැනීම
16/11/2024
ඉතිහාසයේ පළමු වරට කාන්තාවන් වැඩිම ප්‍රමාණයක් (21ක්) පාර්ලිමේන්තුවට තේරී පත්වීම
18/11/2024
කැබිනට් මණ්ඩලය 21කට සිමා කිරීම සහ රාජ්‍ය අමාත්‍යධූර අහෝසි කර නියෝජ්‍ය ඇමතිවරුන් පත් කිරීම
02/12/2024
නව අගවිනිසුරු ලෙස ශ්‍රේෂ්ඨාධිකරණ විනිසුරු මුර්දු නිරූපා බිඳුෂිණි ප්‍රනාන්දු දිවුරුම් දීම
13/12/2024
පාර්ලිමේන්තු මන්ත්‍රී අශෝක රන්වලගේ අධ්‍යාපන සුදුසුකම් පිළිබඳ එල්ල වූ චෝදනා නිසා කතානායක ධූරයෙන් ඉල්ලා අස්වීම
15/12/2024
ජනාධිපති අනුර කුමාර දිසානායක ඉන්දියාවේ නිල සංචාරයක නිරත වීම
17/12/2024
නව කතානායක ලෙස ජගත් වික්‍රමරත්න පත් වීම
18/12/2024
උපයන විට ගෙවීම් බදු සහන සීමාව රු.100,000 සිට 150,000 දක්වා ඉහළ දැමීම
18/12/2024
අදියර තුනක් යටතේ වාහන ආනයනය කිරීම නැවත ආරම්භ කිරීම
20/12/2024
ෆිච් රේටින්ස් ණය ශ්‍රේණිගත කිරීම් ඉහළ යාම
23/12/2024
ජාත්‍යන්තර මූල්‍ය අරමුදලේ විස්තීරණ ණය පහසුකමේ සිව්වන වාරිකය සඳහා අනුමැතිය ලැබීම
23/12/2024
මූඩීස් ණය ශ්‍රේණිගත කිරීම් ඉහළ යාම
23/12/2024
හිටපු ජනාධිපතිවරුන්ගේ ත්‍රිවිධ හමුදා ආරක්ෂාව ඉවත් කිරීම
31/12/2024
ලුතිනන් ජනරාල් ලසන්ත රොද්‍රිගෝ නව යුධ හමුදාපතිවරයා ලෙස සහ වයිස් අද්මිරාල් කාංචන බානගොඩ නව නාවික හමුදාපතිවරයා ලෙස වැඩ භාර ගැනීම
31/12/2024
ආරක්ෂක මාණ්ඩලික ප්‍රධානී ජෙනරාල් ශවේන්ද්‍ර සිල්වා, යුද්ධ හමුදාපති ලුතිනන් ජෙනරාල් විකුම් ලියනගේ සහ නාවික හමුදාපති වයිස් අද්මිරාල් ප්‍රියන්ත පෙරේරා විශ්‍රාම යාම
