ඉන්දීය ක්‍රිකට් පාලක මණ්ඩලයේ ලේකම් ජේ. ෂා ශ්‍රී ලංකාවේ ක්‍රිකට් පාලනය නොකරන බව ජනාධිපති රනිල් වික්‍රමසිංහ පවසයි.
ඉන්දියාවේ ෆස්ට් පෝස්ට් වෙබ් අඩවියේ යූ ටියුබ් නාලිකාව සමග පැවති සම්මුඛ සාකච්ඡාවකදී ජනාධිපතිවරයා එසේ පවසා තිබේ.
ශ්‍රී ලංකා හිටපු නායක අර්ජුන රණතුංග පසුගියදා චෝදනා කළේ, ඉන්දීය ක්‍රිකට් පාලක මණ්ඩලයේ ලේකම්වරයා මෙරට ක්‍රිකට් පාලනය කරන බවයි.
එම ප්‍රකාශය සම්බන්ධයෙන් කනගාටු වන බවත් ඔහු ඉන්දීය ක්‍රිකට් පාලක මණ්ඩලයේ ලේකම්වරයාට එම ගැටලුව ගැන කතා කළ බවත් ජනාධිපති වික්‍රමසිංහ පැවසුවේය.
“ඔවුන් හිතන්නේ ෂා ශ්‍රී ලංකා ක්‍රිකට් බලධාරීන්ට උදව් කරන බවයි. මම ෂා ට කතා කළා, කනගාටුව ප්‍රකාශ කළා ඔහුගේ නම මේ ප්‍රශ්නයට ඈඳීම ගැන…”
“මගේ ස්ථාවරය තමයි නීත්‍යානුකූල පාර්ශ්වයට මම සහාය දෙනවා. ඒ මේ කණ්ඩායම නම් ඔවුන්ට මගේ සහාය ලැබෙනවා. එසේම නීත්‍යානුකූල කණ්ඩායම අනෙක් අය නම්, මම ඔවුන්ට සහාය දෙනවා. නීත්‍යානුකූල වන්නේ තුන්වැනි කණ්ඩායමක් නම් මම සහාය වන්නේ ඔවුන්ට. එය මම නොවෙයි තීරණය කරන්නේ. ජාත්‍යන්තර ක්‍රිකට් කවුන්සිලය විසින්….”
අයි සී සී තහනම සම්බන්ධයෙන් අදහස් දක්වමින් රනිල් වික්‍රමසිංහ මහතා පැවසුවේ, ශ්‍රී ලංකා ක්‍රිකට් තහනම් වීමට ඉඩ ඇති බවට තමාට තේරුම් ගිය බවයි.
ශ්‍රී ලංකාවේ ආර්ථික අර්බුදයට රාජපක්ෂවරුන්ද වගකිවයුතුයි
ශ්‍රී ලංකාවේ ආර්ථික අර්බුදයට රාජපක්ෂවරුන්ද වගකිවයුතු බවට ශ්‍රේෂ්ඨාධිකරණය තීන්දු කිරීම පිළිබඳව මාධ්‍යවේදිනිය කළ විමසීමකට ජනාධිපතිවරයා මේ මේ බව කියා සිටියේය.
‘එයයි අධිකරණය පවසූ ආකාරය. අර්බුදය ඇතිවුණේ ඔවුන්ගේ කාලය තුළදී. එම සිදුවීම් පෙළ සැලකුවිට අර්බුදය ඇති වූ කාල සීමාව සහ ඊළඟට අග්‍රාමාත්‍ය මහින්ද රාජපක්ෂ ඉල්ලා අස්වීමත් විපක්ෂය ආණ්ඩුව භාර ගැනීමට අසමත් වීම ඒ වගේම ජනාධිපති ගෝඨාභය රාජපක්ෂ ඉල්ලා අස්වීමත් සමග සමස්ත පද්ධතියේ කඩා වැටීමක් සිදු වුණා.
වගකීමෙන් තොර ක්‍රියාවන් සෑම පාර්ශවයකින්ම දක්නට ලැබුණා. රාජපක්ෂවරුන්ට ඔවුන්ගේ වගකීම් සමුදායක් තිබුණා’
