පුත්තලම නගර සභාවේ සභාපති කේ.ඒ.බායිස් මහතාගේ මරණය සම්බන්ධයෙන් පුද්ගලයින් සිව් දෙනෙකුව සැකපිට පුත්තලම පොලීසිය විසින් අත්අඩංගුවට ගෙන වනාතවිල්ලුව පොලීසියට බාර දී තිබෙනවා.
ඊයේ සවස වනාතවිල්ලුව – එළුවන්කුලම, රාල්මඩුව ප්‍රදේශයේදී සිදුවී ඇති අනතුරකින් සභාපති කේ.ඒ.බායිස් මහතා මියගියා.
මිතුරන් තිදෙනෙකු සහ රියදුරු සමග සභාපතිවරයා නගර සභාවට අයත් කැබ් රථයෙන් 23 වැනිදා දහවල් එළුවන්කුලම – රාල්මඩුව ප්‍රදේශයේ පිහිටි තම පුද්ගලික වත්තකට ගොස් තිබෙනවා.
එහිදී පිරිස සාදයක්ද පවත්වා ඇති අතර සාදය අවසන් වී නගර සභාවට අයත් කැබ් රථයෙන් පිරිස පුත්තලම බලා ගමන් කර තිබෙනවා.
මෙහිදී සභාපතිවරයා කැබ් රථයේ පිටුපස කොටසේ (තට්ටුවේ) විනෝද වෙමින් ගමන් කර ඇති බවද විමර්ශණ වලදී හෙලිවී ඇති බව පොලිසිය පවසනවා.
අධික වේගයෙන් ගමන් කර ඇති කැබ් රථයක් එක් වරම තිරිංග තද කිරීම හේතුවෙන් එහි පිටුපස සිටි සභාපතිවරයා බිමට වැටී ඇති බවද පොලීසිය විසින් සිදු කරන ලද විමර්ශණ වලදී හෙලිව තිබෙනවා.
අනතුරින් තුවාල ලබා සිටි කේ.ඒ.බායිස් මහතාව එම අවස්ථාවේදීම පුත්තලම මූලික රෝහලට ඇතුළත් කළත් ඒ වන විටත් ඔහු මිය ගොස් තිබී ඇත.
පොලිසිය පවසන්නේ පී.සී.ආර්.පරීක්ෂණයකින් අනතුරුව මිය ගොස් ඇති සභාපතිවරයාගේ මරණය සම්බන්ධයෙන් පශ්චාත් මරණ පරීක්ෂණය පැවැත්වීමට නියමිතව ඇති බවයි.
සිද්ධිය සම්බන්ධයෙන් අත්අඩංගුවට ගෙන ඇත්තේ අනතුරට පත් කැබ් රථයේ රියදුරු සහ එහි ගමන් කළ තිදෙනෙකුවයි.
මරණය සම්බන්ධයෙන් විශේෂ පොලිස් කණ්ඩායමක්ද පරීක්ෂණයක් ආරම්භ කර තිබෙනවා.
මිය යන විට 52 හැවිරිදි වියේ පසුවූ කේ.ඒ බායිස් මහතා සිව් දරු පියෙක්.
